شعر : إبراهيم محمود جبريل
أنا مسامحاك
مهما تعمل طول حياتك .. .جوة قلبى
يابن عمرى .. يابن روحى .. جوة بطنى
وانت نطفة مهما تمغص
وف شهورك جوة ترفس
وف آلامى وف عذابى
وف دوايا .. وف علاجى
روحى ترقص
امتى تيجى واشوف عيونك ؟
مستنياك
ويوم نزولك .. وف نزولك
كل شدة تهون فداك
انا مسامحاك
*****************************
انا مسامحاك
مهما تعمل طول حياتك.. جوة قلبى
والليالى مسهرانى ..
وف رضاعتك
لو سمعتك .. قلبى يخلع ..
وف ثوانى
جسمى ينطر من مكانى
يبقى شبعك .. مهما أسهر هو سعدى
أو فى وجعك لما تهدى
تزول وجيعتى
كل لحظة منضفاك
أو بإيدى بشيل أذاك
غاسلة توبك
حايشة أى سوء ينوبك
وعشان تنام .. مغنيالك .. ومهدهداك
كل تعبى عشان عيونك هو راحتى
وف شريعتى .. أنت نفسى ..
ما فى سواك
أنا مسامحاك
***********************************
أنا مسامحاك
مهما تعمل طول حياتك ... جوة قلبى
دا ف علامك شفت غلبى
تروح دروسك .. تيجى منها
بدعى ربى يكون معاك
من مغربية أو شروق
يحرسك من الناس وعينها
أو صديق ما ينفعك ..
يوقعك فى أى سوء
دانت روحى جوة جسمى ..
أنت دمى فى العروق
وف غيابك حيرتى دمعة فى جفونى
كلها لهفة وشوق
ولكتابك سهرى شمعة ..
منورة .. جوة ف عيونى غ
تفتحه أو تقفله ..
أوخمولك تقتله
بحاجة سخنة منبهاك
كله بميعاد ..
كفوف ايديا منيماك
وبحنانى مصحياك
أنا مسامحاك
****************************
أنا مسامحاك
وف جوازك يابن قلبى
لما زاد جرحى نزيفه
وعمرى أصبح فى خريفه
جت مراتك ناوية حربى
طلَّعت شمسى ف مغاربى
تشتكيلك كل ساعة
وبوضاعة
تنتهز فرصة خروجك
تزيد فى كربى
صوتها يعلى .. تسبّنى
تدعى ربى يشللنى
وما تسمع انت الا صوتها
ومن صويتها .. فوق خدودى لطمْتنى
تضربونى .. تطردونى
طريق طويل مافيه ضياء
دار إيواء
تحطونى ..
وتنسونى
وتنسى أصل محياك
ومانساك
مسامحاك
******************************
مسامحاك
نفسى صوتك اسمعه
عايزة ابنك ادلعه
شوقى .. حضنك ارجعه
انت ابنى.. مهما تعمل طول حياتك ..
جوة قلبى
غبت عنى أو قصاد ى
شفايفى باسمك تعيد .. تنادى
ربى ساعده ينول رضاك
وف طريقه يكون هداك
وعشان يسامحك ..
وف هوانى من أساك
بادعيه ينورلك طريقك ..
يكون حِماك
دانت ابنى .. مهما تعمل طول حياتك ..
جوة قلبى
انا مسامحاك
******************************
إرسال تعليق