✍️ بقلم عبير خضر
زمان، كنا بنسمع عن الرجالة اللي بتتسند عليهم، اللي كلمتهم كلمة، ومواقفهم رجولة بجد، مش مجرد شكل ولا صوت عالي. لكن دلوقتي؟ بقينا نعيش وسط ذكور كتير… والرجالة بقوا عملة نادرة، كأن الرجولة بقت حاجة شبه منقرضة!
الذكورة حاجة… والرجولة حاجة تانية خالص!
الرجولة مش مجرد لقب بيتاخد لمجرد إنك راجل، لكنها أفعال ومواقف بتثبتها. الرجولة مسؤولية، شهامة، التزام، واحترام للناس اللي حواليك.
فين الرجالة بقى؟
فين اللي بيشيل مسؤولية بيته وأهله من غير تهرّب ولا أعذار؟
فين اللي كلمته عهد ما ينكسرش، ووعوده أفعال مش مجرد كلام؟
فين اللي لما يحب واحدة يصونها، مش مجرد محطة وقتية في حياته؟
فين اللي وقت الشدة بيكون سند، مش أول واحد يبيع؟
بقينا نشوف ذكور كتير عايشين بمنطق الأنانية، بيتهربوا من المسؤولية، بيخونوا، بيكذبوا، ويفتكروا إن الرجولة في الصوت العالي والاستعراض الفارغ. اللي يظن إن المال أو المظهر هو سر الرجولة، فاهمها غلط!
الرجولة الحقيقية بقت نادرة… ولو شوفتها النهاردة، اعتبر نفسك في زمن المعجزات!
استرجلوا بقى… الرجولة مش مجرد لقب، الرجولة فعل!
تنويه:
هدفي من المقال مش التعميم على كل الرجال، لأن لسه في رجالة حقيقية بتتحمل المسؤولية وبتتصرف بجدعنة وأخلاق. لكن للأسف، النوعية اللي بتتصرف بعكس كده بقت منتشرة أكتر، وده اللي خلاني أكتب عن الفرق بين الرجولة الحقيقية وبين مجرد الذكورة. إذا كنت راجل بمواقفك وأفعالك، فالمقال مش موجه ليك، بل لكل اللي محتاجين يراجعوا نفسهم!
إرسال تعليق