كتبت..عبير خضر ✍️
في الفترة الأخيرة، بقينا نلاحظ إن فيه شريحة كبيرة من الرجالة بقت بتهرب من تحمل المسؤوليات، سواء جوه البيت أو في الشغل. أوقات كتير، تحسي إن الست هي اللي شايلة البيت كله، والراجل واقف يتفرج.
الرجولة مش بس شجاعة جسدية، دي كمان شجاعة في اتخاذ القرارات ومواجهة التحديات. النهارده بنشوف رجالة كتير خايفة تواجه مشاكل الحياة أو تاخد قرارات مصيرية، وده بيخلينا نسأل: فين المعنى الحقيقي للرجولة؟
زمان، الرجولة كانت معناها إن الراجل يتحمل المسؤولية تجاه أسرته، مش بس من الناحية المادية، لكن كمان عاطفيًا. كان الراجل هو الحامي والسند، اللي دايمًا موجود عشان أسرته تبقى مستقرة وسعيدة. لكن دلوقتي، في رجالة بقت شايفة إن المشاعر والاهتمام بالشريك حاجات مش مهمة أو حتى تفاهة.
للأسف، مفهوم الرجولة بقى عند البعض مرتبط بالفلوس أو المظاهر الخارجية، وده خلق نوعية من الرجالة كل تركيزهم على الشكل ونسوا الأساسيات: الأخلاق، المسؤولية، وكلمة الشرف اللي بتعبر عن الالتزام.
طب إيه الحل؟
إعادة تعريف الرجولة: لازم نغير مفهوم الرجولة في عقول الأجيال الجديدة، ونربطها بالأخلاق والشجاعة والالتزام تجاه الأسرة والمجتمع.
التربية من الصغر: مهم جدًا إننا نعلم الولاد من وهم صغيرين إن المسؤولية والتعاطف هما الأساس. الرجولة مش بس في القوة أو السيطرة، لكنها في دعم اللي حواليهم والتعاون معاهم.
دور الأهل: الأهل لازم يربوا ولادهم على احترام المرأة وتحمل المسؤولية بشكل عملي.
الإعلام والتوعية: الإعلام ليه دور كبير في إنه يعرض نماذج إيجابية للرجولة الحقيقية، ويركز على المواقف اللي بتظهر فيها الشهامة والجدعنة.
الرجولة الحقيقية مش في المظاهر ولا الفلوس، لكنها في المواقف، في الأخلاق، وفي إن الراجل يكون دايمًا السند والظهر للي حواليه.
واخيرا…….
"الراجل اللي يهرب من المسؤولية، بيخسر احترام نفسه قبل ما يخسر احترام الناس حواليه. الرجولة مواقف، مش كلام."
"مش كل ذكر راجل... الرجولة أفعال، مش مجرد لقب."
إرسال تعليق