U3F1ZWV6ZTI4MzIwMDE5NjkzNTY5X0ZyZWUxNzg2NjcxNzI3OTEzMA==

الكاتبة هبة الله يوسف محمود تكتب فرصة تانية - جريدة الهرم المصرى نيوز


 



هبة الله يوسف محمود سند

كاتبة وفنانة تشكيلية

المستشار الإعلامي بجريدة الهرم المصري نيوز

هل تقديم فرص تانية سبب في إستمرارية أي علاقة أصحابها فشلوا في إستغلال وجود فرص حقيقية أولى .

وهل الفرص الثانية والثالثة والرابعة والمليون هم السبب في إستمرار علاقة حتى مع وجود خلل فيها .

فكرة الفرصة التانية مخيفة أكتر من الفرصة الأولى لحد جرب كم ألم الفرصة الأولى وعرف وحس بمقدار اللي هيخاطر بيه تاني وهو قلبه.  

هو حقيقي الأمور بتكون واضحة من الأول الكاذب و المخادع و الشخص الأناني المستغل ماديًا أو عاطفيًا أو جسديًا بيظهر من الأول .

مهما حاولنا ننكر

ف لكل جوادٍ كبوة 

 ولازم الكبوة تبان 

بتبان في قول أو فعل بقصد أو بدون قصد ، المهم ظهور الكبوة دليل ع وجود خلل وجب علاجة أو بتره.

حسب قوة تحملك للكبوة نفسها

بس حقيقي ليه بنحب نتذوق الأذى لآخر نقطه؟!

ليه بنتلذذ ونستمتع بعذابنا بمازوخية مهينة للنفس والقلب والروح؟

 ليه كل واحد بيحب ياخد ع قفاه بمجهوده الشخصي؟ ومش بنتعلم من أخطاءنا ولا أخطاء غيرنا لحد ما قفانا يوجع ويعلم .

يعلم في أجسامنا و أرواحنا و نفسيتنا .

مليون سؤال محتاج مليون إجابه.

بالبلدي كدة

 بيقولوا اللي تعرف ديته إقتله. 

وأنا هقول هنا اللي تعرف حقيقته إحذفه 

إحذفه من حياتك وتفكيرك .

ولازم تفهم

 إن الفرص بتُمنح للي يقدر 

مش اللي يستغلها و للغلط يكرر ، ولوعوده يخلف وينكر .

وللي حابب تكمل وتعيش معاه ولسه عندك طاقة للمناهدة والمقاوحة، ده لو إعتبرنا إن قلوبنا فئران تجارب لنفسيات تاني غيرنا غير سوية.

إحنا بنقدم فرص 

طب ليه ؟

كتر الفرص لشخص محسش بقيمة تضحيتك لإعطائه أكتر من فرصه عشان باقي عليه هتفرق إيه ؟ 

الفرص التانيه

- مش هتغير سلوك شخص فاقد للتربية والأخلاق.

- فاقد للذوق في التعامل. 

- فاقد للرحمة والضمير والإحساس .

- ولا هتعلم شخص الأصول.

- ولا تفهمه الدين والأعراف والبديهيات والأساسيات في العلاقات والتعاملات ، ماهو أصل كل واحد عارف اللي ليه واللي عليه مفيش حد أهبل ، كله عارف وفاهم بس بيختار يستهبل . 

- ولا هتدخل في ثقافته وقناعته ثقافة جبر الخواطر وإحترام مشاعر وآراء ورغبات وأحزان الغير . 

- ولا هتعرف شخص قيمتك في حياته .

- ولا حتى هتعلمه الحب أو إزاي يعرف يحب إنسان ضحى براحته ووقته وحياته عشان يتعب ويحاول معاه عشان كانوا بيحبوا بعض وعايش على أمل إنه يفوق ويحس .

- أو حتى هتخليه يحافظ عليك وهو اللي في البداية إتخلى عنك ب قسوته و جحوده و جموده .

في الحقيقة اللي هيتغير ...هو ( انت ) 

إنت وبس

وهتتغير لنسخة أسوأ من نفسك  

وهتفقد شغفك وطاقتك وهدوءك وصلاحية نفسك ونقاء مشاعرك.

الفرص التانيه حقيقي بتبقى أغلب الأوقات وهمية لناس حقيقية في الأذي والإستغلال والأنانية والسوء .

ممكن تكون فرص جديدة لحياة تعيشها مع إنسان حس بقيمة وجودك في حياته إنسان بتحبه ويحبك وعاوزين تكملوا مع بعض عشان بعض. 

 وممكن تبقى سراب في أرض بور هتفضل تمشي تدور فيها لحد ما هتضيع حتى من نفسك .

لازم نفهم إن كلنا لبعض فرص ومراحل ودروس

إذا أيقنا هذه الحقيقة

سننتهز الفرص ولن نتخلى عنها بغبائنا ونفهم إن إختلافنا مش مجال خلاف ده الكمال الرباني لنكمل بعض أو نتعلم من بعض، وسنمر من مرحلة لمرحلة أخرى بمستوى أعلى من النضج ، وبنفس راضية متيقنة من رحمة الله وسنتعلم من الدروس التي نمر بها وتفرضها علينا الحياة ولو كانت قاسية وبدون رحمة.

  ولن نحزن لغياب أو فقدان أو خذلان أحد ، ولن نبدد ما تبقى من العمر في إنتظار عودة أو تغير أحد .

إنتهزوا الفرص، ولا تبحثوا عنها أو تطلبوها ، وإستعدوا لعبور. المراحل برؤية جديدة وفكر أنضج ، وتعلموا من الدروس التي تفرضها عليكم الحياة. 

ملحوظة

الحب صدفه

صدفه يا حلوه يا وحشه إنت ونصيبك

هو اللي بيختارنا مش إحنا اللي بنختاره 

عمره مكان ولا هيكون فرصة

لو بإيد الشخص يختار الحب في قلبه ويديله فرصه

كانت حاجات كتير في قلوبنا ونفوسنا وحياتنا إتغيرت.

الحب صدفة

أحلى وأسوأ صدفة

عمره ما كان ولا هيكون فرصة تانية.

تعليقات
ليست هناك تعليقات
إرسال تعليق

إرسال تعليق

الاسمبريد إلكترونيرسالة