أنصاف الرجال - جريدة الهرم المصرى نيوز

 

بقلم /نشوى عبد المنعم محمد 

أخصائي صحة نفسية وعلم نفس اكلينيكي ..

#النرجسى لا يمدح جمالك مهما كنتى جميلة ومهما اهتميتى بنفسك لأن كلمات الغزل و الدلع بالنسباله هتحسسك بنفسك و تديقى ثقة و دى كارثة بالنسباله

لازم يحسسك انك معيوبة و يدور ع حاجات فيكى و ف عيلتك وف شكلك يعايرك ويكسر عينك بيها عشان تفضلى طول الوقت شايفة نفسك قليلة وهو كتر الف خيره انه ارتبط بيكى

عمره ما يرسيكى ع بر ف حاجة لأنك لو رسيتى هترتاحى و تطمنى وهو مش عايز كدا عايزك دايما مسحولة نفسيا و فكريا لدرجة انك جسمك مرهق و مهدود من التفكير..

وانتى معاه حتعجزى بدرى وهو هيفضل محافظ ع نفسه هتبقى انتي  معاكى شنطة ادوية بدل شنطة المكياج وهو بيلعب رياضة و بيدور ع صحته و مظهره..

لو تعبتى مهما كان تعبك حتي لو دماغك مفتوحة قدامه هتلاقيه بارد و مش مخضوض عليكى وشايفك بتتسلبطى و بتدلعى ومكبرة الموضوع مع ان هو لو ضفره اتكسر هيروح يعمل اشعة و تحاليل من خوفه ع نفسه

مستحيل يسيبك تشتغلى عشان تفضلى محتجاله دايماوالفتافيت اللى بيحن عليكى بيها تبقى امله وكتر الف خيره ولو سابك تشتغلى حيشيلك الليلة كلها عشان ماتعرفيش تحوشى لنفسك قرش يسندك منه ومن غدره..

لو عرف او لاحظ ان علاقتك بأهلك مش حلوة احب ابشرك انه صياد محترف ف المياه العكره.. هيخربها خالصويبعدك عنهم وعن اى حد من صحابك عشان مايبقاش ليكى غيره و يعايريك بيهم و بمشاكلك معاهم بعد كده

ف الحقيقة وانتى معاه مش بس بتبعدى عن اهلك و عن كل حياتك اللى كانت قبله انتى بتبعدى عن ربنا وبتبعدى عن نفسك وبتكونى تايهه و مشوشة بس مكملة عارفه انه غلط بس مكملة كأنك مدمنة ومش عارفة تبطلي..

بتنسى انك كان عندك طموح ف يوم من الايام بتتمحى حرفيا كل احلامك وبتبقى اكبر امنياتك ان اليوم يعدى ع خير م غير نكد..

ع فكرة هو مستحيل يرسم الحب و الجواز ع واحدة شايفها خبرة و فاهمة الدنيا و سيطرة هو بيدور ع واحدة كيوت غلبانة ف نفسها طيبة مش بتاعة مشاكل و ياسلام لو اهلها كمان مش بتوع مشاكل عشان يعمل اد ما يعمل ماحدش يقف له.. ما بيقربش من الستات القوية اللي بتهتم بالماديات واللى هتديله فوق دماغه من اول يوم.. هو عايز واحدة يجيبلها شوية رمل من ع الارض تقوله تعيش و تجيب وكتر خيرك

ياريت ماحدش يقول انه مجرد مريض و ضحية عشان هو بجد شيطان..

مرض بيدخل جسمك مش قلبك بيدمرك ف كل حاجة..

فبلاش تتعاطفى معاه وانقذى نفسك وعيشى حياتك

كونى قويه