رسالة ليك في العشره الاوخر - جريدة الهرم المصرى نيوز

 

ولاء صبري الدسوقي

__________

-الحب يا بني...بيجي مرة واحدة في العمر

فلما تقابله...بلاش تضيعه من إيديك

*إيه الكلام الكبير ده؟!

لا ..ده إحنا نعمل شاي بقى 

هو إنت يا حاج حبيت زينا؟!

-زيكم؟!

هو زمانكم ده يا بني...يعرف حاجة عن الحب...

الحب بصحيح...كان على أيامنا...كل حاجة كانت ماشية تغني..

إنما دلوقت..كل حاجة ماشية بتجري..

تزعق... تفكر..وتحسبها مية مرة..أنا هستفيد إيه

إحنا كنا بنحب للحب...عمرنا ما حسبناها..

حتى لو مفيش نصيب...

يفضل الود جوه القلب متصان...ميتغيرش

زي الدهب تمام...كل مدى..قيمته تكبر..

"يعني حبيت..

يا ماما..ههه

-بس يا ولد

*طب ولما حبتها..متجوزتهاش ليه؟!

-علشان كنت مغفل... 

أو تقدر تقول...معرفتش إني حبتها أوي..غير بعدين 

 مقدرتش أفهم حقيقة مشاعري ناحيتها..

الدنيا خدتني..وقلت لسه العمر قدامي...

ولسه هقابل كتير...

*طب كانت حلوة أوي كده.. شكلها كان إزاي؟!

-اللي يحب يا عبيط...مبيحبش صورة.. ديه أرواح بتتقابل..

كل حبيب شايف محبوبه...ٱية في الحسن 

بس لو هوصفها...فمقدرش أقول عنها...غير إنها..كانت عاملة زي... أول خيط للفجر..بعد ليل طويل..

 وكل اللي قابلتهم بعدها..كانوا نور ضعيف ..

مقدرتش أشوف نفسي فيه...