بقلم / ندى يحيى
جربت قبل كدة تسعد نفسك بنفسك ؟!
طيب جربت تعيش مع نفسك ومتكونش محتاج لوجود شخص يكون هو سبب سعادتك او حُزنك ؟!
لو إجابتك "نعم" كدة إنت إنسان قوى وفاهم وفهمت إن سعادتك بإيدك وتحت تصرفك انت وبس وكمل طريقك كدة .
لو إجابتك "لا"
كدة إنت محتاج تقعد مع نفسك وبسرعه عشان توصل للمرحلة الرائعه دى وهقولك ازاى .
ربنا خلق الإنسان قادر على فهم وإسعاد نفسه وكمان خلق عنده الإرادة الداخليه اللى تخليه يقدر يعمل أى وكل حاجه مهما كانت بس لو عاوز فعلاً .
وانا بعد تأكيد التجربه بقولك إنك تقدر فعلاً متكونش محتاج شخص يكمل سعادتك او حتى يكون سبب فيها .. لا وكمان تقدر تعيش لوحدك بدون علاقه عاطفيه عادى جدا .. ايوا متستغربش كلامي .
يعنى هو فى حد يقدر يفهمك اكتر او يحس بيك اكتر من نفسك ؟!
الإجابه غالبا هتكون لأ
ومن هنا بقى نقدر نلعب على الحته دى ونستفيد منها ...
يعنى تقدر تسعد نفسك باإنك تشوفها عاوزة إيه وتنفذه وفورا او عالاقل أقرب حاجه للى إنت عاوزه .
يعنى مثلا تقدر تخلى نفسك تحس بالأمان والسلام الداخلي والراحه لما تتأكد فعلا ان نفسك مكملة اى فراغ عندك .
تقدر تسمع نفسك وتتكلم معاها وبصوت مسموع لأ وكمان يبقى فى بينكم حوار .. لا ده مش جنان .. ده عين العقل وكمان القوة .
تقدر تخرج وتنبسط باأبسط خروجه وحاجه حلوة بتحبها تشتريها لنفسك .
تقدر تتفرج على حاجه بتحبها وتتابعها وتعيش معاها .
تقدر تفصل من الدنيا كلها وتسافر اى مكان قريب منك ولو يوم واحد بس تقضيه مع نفسك وتغير مود .
تقدر تنفذ اى فكرة مجنونه فاى وقت يناسبك براحتك .
تقدر تعيش أجمل واكتر حياة مريحه ومستقرة نفسياً مع نفسك اللى فاهماك ودايما عاوزاك احسن بدون اى مصلحه طبعا .
نصيحتي الذهبية لك عزيزي
" لا تجعل احد مُتحكم فى سعادتك او حُزنك "
" كن أنت قائد سفينة حياتك .. لن يُحبك ولن يفهمك احدٌ غيرك أنت " توقف عن البحث و " إكتفى بنفسك ".
إرسال تعليق