🔴 ... فرنسا من شوية اعترفت رسميًا بفلسطين.. وبعدها موناكو.. وامبارح بريطانيا وكندا وأستراليا والبرتغال هما كمان أعلنوا رسميًا اعترافهم بالدولة الفلسطينية، في خطوة كانت شبه مستحيلة من سنتين بس...
️ لكن في نفس الوقت على الناحية التانية، إسرائيل بدل ما تتراجع وتحاول تمتص الموقف الأوروبي وتغير سياستها عشان تحتويه، عملت العكس تمامًا، وأعلنت انه: "لن تكون هناك دولة فلسطينية"، وبتخطط دلوقتي للرد على الموقف التاريخي لأوروبا بإعلان سيادتها الكاملة على الضفة الغربية، وضمها لإسرائيل!
⚫️ ومش بس كده... دول بينفذوا بالفعل عملية دفع الفلسطينيين نحو منطقة المواصي اللي على حدود مصر، ومعاهم ضوء أخضر أمريكي من ماركو روبيو وزير الخارجية الأمريكي شخصيًا، تمهيدًا لتنفيذ مخطط التهجير والصدام المباشر مع مصر...
🔹️️ تعالى أحكيلك التطورات اللي حصلت في الشرق الأوسط خلال ال 48 ساعة اللي فاتوا، عشان تبقى فاهم الأحداث رايحة لفين والعلاقة ما بينها أيه.. وخلينا نبدأها واحدة واحدة... 👇
🔴 شوف يا سيدي…
1️⃣ أول حاجة لازم تفهمها إن اعتراف بريطانيا بالذات بالدولة الفلسطينية اللي حصل امبارح، له رمزية تقيلة جدًا...
ليه؟!
عشان دي نفس الدولة اللي في 1917 أصدرت وعد بلفور اللي أسس لقيام إسرائيل، وهي اللي دعمت الهجرة الصهيونية للأراضي الفلسطينية، واللي أدت للاستيلاء عليها بالكامل وحدوث النكبة سنة 1948...
🟢 فلما الدولة دي بقى تيجي النهارده بعد ما يقرب من 100 سنة وتقولك انها بتعترف بفلسطين، ف ده مش مجرد خبر عابر... دي إشارة واضحة إن أوروبا بتفك نفسها تدريجيًا من الهيمنة الأمريكية، وبتحاول دلوقتي تبني لنفسها دور مستقل في الشرق الأوسط، بعيد عن السياسة الأمريكية...
🟡 ده غير ان اعتراف فرنسا كمان في مؤتمر الأمم المتحدة من شوية، واللي جزء كبير منه يرجع لجهود الوساطة الدبلوماسية المصرية والسعودية، عمل ورقة ضغط كبيرة وتحدي ضخم لإسرائيل وأمريكا، وغالبًا هيخلي معظم باقي دول الاتحاد الأوروبي تعترف هي كمان خلال الساعات اللي جاية، وده في رد فعل الإعلام عليه حاليًا واضح انه رجع لفرنسا جزء كبير من بريقها ونفوذها السياسي قدام الرأي العام العالمي، وأكد على زيادة نفوذها كقائدة حالية للتكتل الأوروبي كله...
🔸️ طب سؤال... هو ليه أوروبا عملت كده دلوقتي؟
السبب يا صديقي هو ان أمريكا تحت إدارة ترامب غيرت مواقفها التاريخية مع أوروبا، وأصبحت حاليًا مشغولة بأولويات تانية تمامًا… محاولة التضييق على الصين بملف التجارة وتحجيم نفوذها المتزايد، وجنب ده ضمان أمن مستعمرتها الشرق أوسطية اللي اسمها إسرائيل بأي تمن...
🟣 حتى لو كان التمن ده هو التخلي عن أوروبا وأوكرانيا وتركهم يواجهوا روسيا لوحدهم، واللي بدأت بالفعل تتوسع وتتوحش، وتهددهم بشكل محصلش قبل كده في أي فترة من فترات التاريخ...
فبالتالي أوروبا فجأة لقت نفسها محشورة بين ضغط الشارع اللي بيشوف المجازر في غزة على التلفزيونات يوميًا، وبين حكومة أمريكية بترفض حتى وقف إطلاق النار، وكمان حتى مش واقفة جنبهم سياسيًا وعسكريًا زي ما كانت زمان، وسايباهم في مواجهة الروس لوحدهم... وعشان كده خدوا الخطوة كرد على السياسات الأمريكية ونوع من محاولة فك الارتباط بالتوجه الأمريكي في الشرق الأوسط...
2️⃣ 🟠 لكن اللي حصل ده في الواقع، وبرغم انه حدث تاريخي وكبير جدًا في رمزيته ومعناه، وبيفتح فرص جديد للفلسطينيين تحت القانون الدولي، إلا انه على أرض الواقع أدى لنتيجة عكسية خطيرة جدًا...
اسرائيل بدل ما تاخد خطوة تهدئة قدام الضغط الدولي، أعلنت انها هتسعى لضم الضفة الغربية وفرض سيطرتها عليها واحتلالها بالكامل، كنوع من "العقاب لأوروبا" على اعترافهم بالدولة الفلسطينية، وعشان يقطعوا الطريق على حماس أو السلطة الفلسطينية بإنهم يأسسوا دولة!
🔵 وده مش مجرد كلام وخلاص... للأسف التصعيد بالفعل بيزيد مع كل دقيقة، والحكومة الاسرائيلية خدت خطوات فعلية منها ان مشروع E1 اللي بيضم حوالي 88% من أراضي الضفة الغربية للنفوذ الاسرائيلي اتصدق عليه بالفعل، وكمان من ساعات ظهرت تقارير في صحف إسرائيلية بتقول ان وزير الخارجية الأمريكي (بتفويض كامل من ترامب) إدالهم الضوء الأخضر لتنفيذ الخطوة دي كرد على الخطوات الأوروبية...
🔹️ طب ليه؟!
عشان هما شايفين ان اعتراف أوروبا بفلسطين معناه انها كده هيبقى ليها كيان رسمي أكثر تأثيرًا كدولة في عيون الأمم المتحدة، وده ممكن يهدد وجودهم هما نفسهم وشرعية دولتهم المزعومة.. وعشان كده عايزين يدمروا أي احتماليات لقيام دولة فلسطينية من خلال تدمير السلطة الفلسطينية الشرعية بضم أراضي الضفة...
⚫️ وفوق كل ده، متنساش ان المشروع الأساسي في عيونهم هو تمديد حدود اسرائيل الكبرى، واللي هما بيسعوا له بدعم كامل من أمريكا دلوقتي... والله أعلم هما ماسكين أيه على حكام أمريكا، للدرجة اللي مخلياها سايبة كل مصالحها اللي في العالم، وماشية وراهم وبتدعمهم في كل حاجة، حتى بحق الفيتو كمان، في المحافل الدولية... (غالبًا ملفات إبستين ليها علاقة كبيرة بالموضوع)...
🟢 الموضوع واصل لإن من يومين ظهر خبر غريب، بيقولك ان أمريكا وقفت حزمة مساعدات عسكرية وأسلحة كانت المفروض تروح لتايوان بقيمة نص مليار دولار، قبل المكالمة اللي دارت ما بين ترامب والرئيس الصيني شي جينبينغ..
🔘 وحاليًا المحللين السياسيين في شؤون شرق أسيا بيقولوا ان تقريبًا السر وراء قرار التجميد المفاجيء للمساعدات لتايوان ده، هو بسبب ان أمريكا بقت بتفاوض حتى بورقة تايوان نفسها، مقابل انها توصل لاتفاق مع الصين يقلل يخفف الضغط التجاري والاقتصادي اللي عاملاه الصين عليها شوية، مقابل انها تركز اكتر مع اسرائيل!
يعني أمريكا بعد ما تخلت عن أوروبا وسابتها لروسيا، بقت حتى بتهدي اللعب مع الصين، عشان تركز مع اسرائيل بشكل كامل... وهسيبلك الخبر تحت في المصادر في أول كومنت 👇
🔸️ طب يعني الخلاصة من كل ده إيه؟
الخلاصة هي إن إسرائيل دلوقتي بتستغل موجة الاعترافات الأوروبية كمبرر داخلي للضم الكامل للضفة الغربية،بضوء أخضر كامل من أمريكا... وما زالت ماشية في خطواتها على طريق تهجير الفلسطينيين من قطاع غزة ناحية الحدود المصرية، واللي بيشكل حاليًا أكبر تحدي أمني لمصر في تاريخها الحديث... وبسببه ف مصر بتحشد أكبر عدد من القوات وأنظمة الدفاع الجوي على الحدود منذ حرب أكتوبر...
⚫️ يا ترى أيه اللي هيحصل بعد الخطوات دي؟ ورد فعل نتنياهو على التطورات دي، واللي قال انه هياخده بعد عودته من أمريكا هيكون أيه؟!
هو ده اللي هنعرفه مع بعض خلال الساعات اللي جاية...
🔴 الكاتب/ يسرى الريان ،
شكرًا..
إرسال تعليق