كتبت عبير خضر ✍️
الخوف من الاقتراب من الناس شعور بيجي بعد تجارب
مؤلمة سابت جوانا أثر عميق خلانا نحس إن أي محاولة جديدة للتقرب من حد ممكن تنتهي بصدمة جديدة فنبدأ ننسحب ونتجنب العلاقات ونبني حوالينا جدار يحمي مشاعرنا من الأذى لكن المشكلة إن الجدار ده بدل ما يحمينا بيحبسنا جوانا إحنا بس بنعيش في عزلة حتى لو حوالينا ناس كتير بنحس إننا لو اتكلمنا محدش هيحس بينا ولو قربنا هنتوجع فبنقرر نبعد ونتجنب وده بيخلينا ندخل في دائرة من الوحدة والقلق وعدم الثقة اللي مع الوقت بتتحول لأسلوب حياة
التجارب السابقة اللي سببت الخوف ده ممكن تكون خيانة من حد كنا واثقين فيه ممكن تكون انتقادات جارحة هزت ثقتنا في نفسنا ممكن تكون فقدان شخص كان غالي علينا فبقينا نخاف نتعلق بأي حد جديد لأننا عارفين إن الفقدان موجع ممكن كمان تكون علاقة سامة استنزفت مشاعرنا وخلتنا نحس إن أي علاقة جديدة ممكن تكون بنفس الشكل المؤذي وهنا بيبدأ العقل يربط بين العلاقات والألم بين القرب والخذلان فبيقرر يحافظ علينا بطريقته وهي إنه يقفل الباب تمامًا قدام أي فرصة جديدة
لكن الحياة مش بتمشي كده العزلة مش حل والخوف مش لازم يفضل يحكمنا محتاجين أول حاجة نعترف إن عندنا مشكلة وإن اللي بنحسه طبيعي لكنه مش لازم يستمر بعدها نبدأ نلاحظ إحنا خايفين من إيه بالضبط إيه اللي بنحاول نحمي نفسنا منه وهل فعلًا كل الناس زي اللي آذونا قبل كده ولا إحنا بس شايفينهم من نفس الفلتر القديم لازم كمان ندرك إن مش كل حد نقابله في حياتنا هيكرر نفس التجربة مش كل علاقة جديدة هتنتهي بجرح
إعادة بناء الثقة محتاجة وقت مش لازم نفتح قلبنا مرة واحدة لكن ممكن نبدأ بخطوات صغيرة نجرب نتكلم نشارك ولو بجزء بسيط نراقب أفعال الآخرين بدل ما نحكم عليهم مسبقًا نحط حدود تحمينا من الأذى بدون ما تعزلنا تمامًا ونتعلم نفرق بين مشاعر الخوف اللي جاي من تجارب قديمة وبين الحدث الحقيقي اللي قدامنا دلوقتي لو لقينا إننا مش قادرين نخرج من الدائرة دي لوحدنا مفيش مشكلة أبدًا في طلب المساعدة من شخص موثوق أو حتى متخصص ممكن يساعدنا نعيد برمجة أفكارنا ونخرج من الخوف اللي حبَسنا
الحياة فيها علاقات صادقة وأشخاص ممكن يكونوا دعم حقيقي لينا مش لازم نصدق ده على طول لكن ممكن ندي نفسنا فرصة صغيرة نجرب خطوة جديدة بدون توقعات بدون خوف مجرد تجربة ولو لقينا إن في حد يستحق نحاول نتقبل إن مش كل الناس زي بعض وإننا نقدر نلاقي الأمان من تاني لو ادينا نفسنا الفرصة
إرسال تعليق